BATO, LEYTE – Sikop sa operasyon kontra illegal nga drogas ang tolo ka suspitsadong lalaki diin ang usa niini naa sa kategorya isip High Value Individual (HVI) ug duha niini ka konsabo.
Napohag ang mga durogista sulod sa ilang gi pwestohan nga ‘drug den’ didto sa Brgy. Ponong, lungsod sa Bato niadtong Deciembre 4 mga alas 10:50 sa gabii.
Sa giluwatan nga report sa Bato Municipal Police Station nga nag lunsad sila og buy-bust alang kang Carlito Perez, 32 anyos, diin naka palit ang police nga poseur-buyer sa usa ka paketi sa gituhuang shabu. Apan naabtan didto sa sulod ang duha pa ka kauban niini nga sila si Noel Manos, 26, ug Neil Sanchez, 34.
Pag kap-kap sa ilang lawas nakuhaan sa iyang posisyon si Perez ug lima (5) ka dagkong paketi o gibana bana nga 15g sa gituhuang shabu. Niabot usab og PHP 105,000 kapin kon kulang ang kantidad sa mga nasakmit sa gidudahang shabu.
Ang mga ebedinsya gidala sa PDEA alang sa Chemical Analysis.
Samtang ang tolo ka suspek gidala sa Bato Municipal Police Station diin gi hikay na ang mga kaso batok kanila ubos sa Section 5 og Section 11 sa Article 11 sa Republic Act 9165. Hinuon gipasabot sila sa ilang katungod pinaagi sa “Miranda Doctrine.” Gilangkoban ang joint operation sa PDEA RO8 NSPO, RSET, SIU Leyte og ang Bato Municipal Police Station sa pagpanguna ni PLT Reno D. Dante. Ni Josie Sersena (EV Mail December 5-11, 2022 issue)
