Dear Atty. Golo,

Ngano daghan mang mo reklamo sa “Sovereign Wealth Fund” nga para man sa katawhan. Mo “believe” jud ta sa ato mga “leaders” kay da best gud na sila. Ang mga “congresista” maoy “watchdog.” Mag “unite” na ta aron mobalik pag-asenso ang Pilipinas. Kakita jud ko sa Tiktok. Hayahay kaayo ang Pinas pag Martial Law. Way record sa pangurakot ang ato governo. Daghan lang Marites karon, kusog magduda. Pareha sa akong asawa, kon dugay ko mouli magduda nang “chicks” ko, simhoton hasta ang ako pundijo.

31 Milyon gud me, Edie,

Dear Edie,

Sa Malaysia, na bangkarota ang ila “wealth fund” kay gibulsa sa ila Prime Minister. Di ka maka basol sa mga tawo nga mapaaw kay sila ang tag-iya sa kwarta. Ang record sa ato mga leader kadudahan, dili mobayad og buhis, og binilyon ang kwarta gihakot ngadto sa Switzerland niadtong Martial Law (G.R. No. 152154). Korte Suprema ang nag-ingon, dili Tiktok. Ang 31 million nailad na, ang 80 million ilaronon pa. Ayaw’g salig sa mga “watchdog” nga buaya. Pasalamat ka ang misimhot nimo asawa, dili buaya.

Imo amigo, Manny G. Golo (EV Mail January 16-22, 2023 issue)