Dear Atty. Golo,
Nag “post” ko sa “facebook” nga mabdos ko unya nangutana ko unsa maayo ingan sa bata nga may labot ang dagat. Gibinuangan ko. Dihay mi “comment” nga ang ngan kono “Serena.” Diha poy miingon “Okoy.” Ngano mag yaga-yaga man? Mag seryoso unta sila kay seryoso baya ko. Diha man go’y nalunod niadtong bagyong Egay. Kon Egay lang kaha ang ako ipangan sa bata. Kanang Egay, babaye na? Kon laki, Egoy? Naa na ko’y nahuna hunaan nga Ninang sila si Odet og si Bising. Ang Ninong lang ang wa pa, pwede ikaw? Kon ikaw pabot-on, unsay maayo ngan?
Excited Mommy,
Salome
Dear Salome,
Kon ako’y imo pabot-on, ikaw og ang amahan sa bata maoy magboot. Ayaw kasoko sa nag “comment” nga di seryoso, kay basin nagtoo sila nga nagyagayaga ka. Kon gusto ka’g seryoso nga tambag, adto pangutana sa imo mga maguwang, o kaha sa Pari kay siya man ang mobunyag. Pwede pod ka mobasa sa almanake kay naa diha ang ngan sa mga Santos nga pwede himoong idolo sa imong bata pohon. Ayawg salig anang dagat. Adto salig sa Guinoo nga mao ang naghimo sa dagat (Gen. 1:10). Bahin sa pagka Ninong, unya na lang ta mag-estorya kon manganak na ka.
Imong Pare pohon,
Manny G. Golo (EV Mail July 24-30, 2023 issue)
