≡ Menu

Mrs. Dilao, udtong tutok gi-hold up, laing babaye gikuotan

ORMOC CITY – Duha ka babaye ang biktima sa kawat, usa ang gihold-up ug lain ang gikuotan niadtong Pebrero 16, apan managlahi nga oras ug dapit.

Ang unang biktima mao si Myrna Dilao, 64, retiradong empleyada sa kanhi PNOC ug karon EDC na ug asawa usab ni Menelo Dilao, kanhi manager sa PNOC. Ang sunod nga biktima mao si Elizabeth Padayao, 55, taga Camella Homes sa Tambulilid.

Si Dilao nitug-an nga nakuha gikan kaniya ang iyang wedding ring balor P35,000, pulseras, ug kuwentas. May kuarta siya kay gikan siya sa banko nag-withdraw pero way kuartang nakuha gikan kaniya.

Sa inbistigasyun ni PO3 Dindo Tuando, nasayran na naglakaw si Mrs. Dilao dapit sa Real –Lopez Jaena Sts. alas onse sa buntag ug may usa ka tawo nidip-ig kaniya ug ni anunsiyo’g hold –up. Wala makalihuk ang ginang, wala sad kini mosinggit kay nahadlok nga tingaleg duslakon siya sa kutsilyo nga giti-on dapit sa iyang tuong kilid. Daghan tawo ang lugar apan way nakamatikud kay wala siya makatingog. Human nakuha ang iyang mga alahas, daling nisibat ang suspek agi sa dalan Rizal. Ang pangidaron sa suspek bana-bana 35 ngadto sa 40 anyus, mga 5”6’ ang gitas-on.

Polong sa pulis, hayan wala magka interes ang tulisan sa kuarta sa ginang kay nahadlok malangan ug masabtan hinuon siya sa gihimong kremin.

Sa bahin ni Elizabeth Padayao, tug-an niya sa mga pulis nga alas sais na sa gabii samtang diha siya siyudad nagpalit og sud-an, usa ka tawo ang nikuot sa iyang pitaka nga may sud dol-an P7,000. Ang pitaka didto sud sa bitbit niyang bag dihang nitupad kaniya ang usa ka lalake, bana-bana anaa sa 20 ngadto sa 30 anyus. Nahibulong ang ginang kay nagdali man og biya ang lalake sa iyang tupad, pagsusi pa niya sa iyang bag, abli na ug wala na ang pitaka. Ni Paul Libres



Comments on this entry are closed.

WP2Social Auto Publish Powered By : XYZScripts.com