Dear Atty. Golo,         

Tinood ang sinulog sa Cebu, nag-away ang governor og ang mayor? Daghan man konong mga “contingent” nga wa molahos og apil. Dili sila ganahan adto ang “grand parade” sa SRP kay dili nindot nga lugar. Unsa man nang SRP? Kining mga katoliko way klaro. Mag sinulog unya mag-away. Magsimba og larawan nga dios-dios man na, supak sa bibliya. Pareha sa Pag-asa, miingon nga ang dautang panahon, tungod sa “shareline” unya ang binisaya, panag-abot sa bugnaw og init nga hangin. Naa bay bugnaw nga init. Mora man sa  “cold” nga “hotmilk”. Ngano ang Pag-asa lisod man sabton?

Gwapa kanunay, Bikay

Dear Biks,

Wa mag-away ang mayor og governor. Wa lang sila magkasabot. Sa una, ang “culmination” sa “grand parade” anha sa Cebu City Sports Center. Karon, diha na sa South Road Properties. Ang importante mao ang debosyon sa Balaang Bata. Ang sinulog, pagpadayag lang. Dili dios-dios ang gisimba kay tinood mang Dios ang Batang Jesus. Ang gisimba mao ang gilarawanan, dili ang larawan. Dili ngil-ad ang larawan. Gani, ang Guinoo misugo ni Moses paghimo og mga larawan (Ex. 25). Ang Pag-asa, sayon ra man sabton. Lisod lang ka pasabton. Hangin ang gihisgotan. Ang imo  “hot milk”.

Imong amigo, Manny G. Golo (EV Mail January 9-15, 2023 issue)