KANANGA, LEYTE – “Dead on the spot” ug wala nay kinabuhi si Raul Cosinillo dihang midangat ang autoridad sa Sitio Laray, Brgy. Naghalin, ning lungsod mag ala una ang takna sa udto niadtong Mayo 10.
Ang 43 anyos nga biktima sa pag pamosil kasamtangan nga Kapitan sa Barangay Mataloto, lungsod sa Leyte, sakop sa 3rd District, Lalawigan sa Leyte.
Sa taho, gikan sa Ormoc City ug gimaniho ni Kapitan ang kolor gold nila nga multicab. Dihang pag abot sa dapit, kalit gipa uwanan ug bala sa wala mailhing mga suspitsado nga sakay sa single motorcycle. Nanga buslot ang kilid nga samin sa multicab dapit sa gilingkoran sa biktima. Natapsingan pod ang asawa niini nga si Mercedes Cosinillo, 52 anyos, kinsa tapad sa passenger’s seat naglingkod; hinuon luwas ra ang kahimtang sa ginang.
Samtang walay tatsa ang 21 anyos nga anak babayi nga naka pwesto sa likod nga bahin sa sakyanan.
Dali nga niikyas ang mga suspitsado sa wala hisabti nga direksyon. Naka rekober ang autoridad og mga kabhang sa armas, pero wala pa matino kon unsa nga kalibre ang gigamit. Sumala sa Kananga Police nga padayon pa ang imbistigasyon sa maong kaso.
Gipaninguha karon sa autoridad nga maila ang mga suspek og masabtan ang motibo sa krimen. Gani nag mugna og Task Force ang Police Regional Office 8 alang sa hinanali nga kasulbaran sa kaso.
Mahinumdoman nga sa unahan lang nga Barangay (Brgy. Libongao) nahitabo ang pag posil patay usab sa igsuong babayi sa Mayor sa San Isidro, Leyte (3rd District) gihapon hinapos nga bulan sa nilabay nga tuig. Ni Josie Sersena (EV Mail May 8-14, 2023 issue)
