≡ Menu

16 ka GRO na way hygiene cards, girekupo

ORMOC CITY – 16 ka mga Guest Relation Officer (GRO) ang girekupo sa mga kawani sa City Health Office kay wa nay mga hygiene cards. Ang mga GRO didto nila madakpi sa nagkadaiyang KTV bars dinhi sa siyudad. Ang team sa CHO gipangulohan ni Sergio Morga Jr..

Sa police report nakuha gikan sa station, ang mga membro sa CHO team mao sila si Judith Bacani, James Sia, Norman Laurente, Temothy Penaranda, Emelyn Isalina, Jacjie Cris Cuyos ug Ireneo Bonsilao, kadaghanan kanila mga nurses sa City Health Office.

Hapit na alas diyes sa gabii, gisuhid sa taga CHO ang Jonas KTV Bar, Sabino KTV Bar ug Rafael KTV Bar. Didto ilang naabtan ang mga babaye nga nag atiman sa ilang customer ug uban kanila naghuwat og mga prokyano. Ang 16 ka mga GRO gidala sa station I, apan gitataw ni PO3 Elizar Tero nga gibuhian ang mga babaye ug gimandoan pag-report ngadto sa CHO aron mahiling o ma-eksamin.

Adunay mga pangalan nakuha ang EV Mail sa mga babaye apan gipugngan. Istrikto ang CHO pag monitor niining mga babaye nga nagnegosyo sa tawhanong kalipay, labi pa nga nag anam kataas ang kaso sa nakabaton og HIV sa atong rehiyon.

Usa ka higayun, nahinabi sa mga tigbalita ang nurse sa DOH regional office ug nag-ingon nag kadaghan karon sa Eastern Visayas ang adunay HIV, apan mas daghan pa gyod sa ubang dapit sama sa Cebu.

Ang mga GRO isyuhan og card sa CHO ug kini ang ilhanan kon na eksamin ba o wala ang maong babaye, base sa petsa nasuwat sa card. Gi-awhag ang mga parokyano nga mangita aning hygiene card alang panalipod sa ilang kaugalingon, labi na kun may asawa, aron dili pud intawon matakdan ang ilang mga kapikas. Ni Paul Libres



Comments on this entry are closed.

WP2Social Auto Publish Powered By : XYZScripts.com